Киләсе елга мәктәпкәчә, гомуми һәм өстәмә белем алуга хокукларны гамәлгә ашыруның дәүләт гарантияләрен финанс белән тәэмин итү нормативларын раслау турында закон проектларын бүген Бюджет һәм финанс комитеты утырышында карадылар. Моннан тыш, парламентарийлар берничә федераль закон проекты турында фикер алышты. Утырыш видеоконференция режимында узды.

Киләсе елга мәктәпкәчә, гомуми һәм өстәмә белем алуга хокукларны гамәлгә ашыруның дәүләт гарантияләрен финанс белән тәэмин итү нормативларын раслау турындагы закон проектлары, аларда язылган нигезләмәләр республиканың төп финанс законында исәпкә алынсын өчен, ел саен бюджет каралганчы кабул ителә. Мәгариф һәм фән министрының беренче урынбасары Илсур Һадиуллин билгеләп үткәнчә, 2021 елга мәктәпкәчә һәм мәктәп, шулай ук өстәмә һәм һөнәри белем бирү программаларын гамәлгә ашыруны финанс белән тәэмин итү нормативлары 2020 ел дәрәҗәсендә сакланган.

Илсур Һадиуллин шулай ук хәзерге вакытта Татарстанның барлык мәктәпләрендә башлангыч сыйныф укучылары өчен бушлай туклану оештырылуын  әйтте. Моннан тыш, укытучыларга сыйныф җитәкчелеге өчен түләүләр тулы күләмдә күчерелә. Әлеге үзгәрешләрне исәпкә алып, шуны әйтергә мөмкин, бер укучыга чыгымнар хәтта арткан да.

Бүген комитет утырышында депутатлар Россия Федерациясе Салым кодексының икенче өлешенә ягъни физик затларның салым чоры өчен 5 миллион сумнан артык керемнәренә салым салу өлешендә үзгәрешләр кертү турында федераль закон проектын хуплады һәм әлеге мәсьәләне Дәүләт Советының иң якын утырышының көн тәртибенә кертергә тәкъдим иттеләр, анда бу нисбәттән карар кабул ителәчәк.

Бюджет, салымнар һәм финанс комитеты рәисе Леонид Якунин билгеләп үткәнчә, әлеге закон проекты Россия Федерациясе Президенты Владимир Путин тәкъдиме буенча Россия Хөкүмәте тарафыннан кертелә. Эшләнгән документ авыр чирле балаларны, шул исәптән сирәк авыруларны (орфан) дәвалауга финанс чараларының өстәмә чыганагын булдыруга юнәлтелгән.

Закон проекты тарафыннан 2021 елның 1 гыйнварыннан физик затларның салым чорында керемнәре 5 млн. сумнан артып киткән очракта салым буенча ставкаларны арттыру күздә тотыла. Федераль закон проектын эшләүчеләр фикеренчә, әлеге үзгәреш елына 60 млрд. сум күләмендә өстәмә салым кеременә китерәчәк. Бюджет ассигнованиеләре «Сәламәтлек саклауны үстерү» дәүләт программасы буенча федераль бюджет формалаштырганда резервланачак.

Комитет утырышында башка мәсьәләләр дә каралды. Профильле комитет эшендә Дәүләт Советы Рәисе урынбасары Юрий Камалтынов катнашты.