Бүген парламентта ТР Дәүләт Советында КПРФ фракциясе оештырган "ТКХ проблемалары турында" түгәрәк өстәл узды. Анда депутатлар, министрлыклар һәм ведомстволар вәкилләре, инициатив төркем әгъзалары катнашты.

Фракция җитәкчесе, ТР Дәүләт Советы депутаты Хафиз Миргалимов парламентарийларның республика халкыннан ТКХ мәсьәләләре буенча күпсанлы мөрәҗәгатьләр алуын билгеләп үтте. Бу тема даими рәвештә фракция, парламентның профильле комитеты, Дәүләт Советы утырышлары дәрәҗәсендә карала. Канун чыгаручы һәм башкарма хакимият органнары үзара тикшерелә торган мәсьәләләрне хәл итүнең иң кулай вариантларын бергәләп табарга тиеш, дип саный Хафиз Миргалимов.

Утырышта катнашучылар хисап-фактура, тарифлар, коммуналь хезмәтләр (җылылык, кайнар су, салкын су, электр энергиясе) буенча исәп-хисап мәсьәләләре буенча җентекләп фикер алыштылар. Инициатив төркем әгъзалары идарәче компанияләр эшенә зарланды, алар исәпләү приборларының күрсәткечләрен еш кына арттырып җибәрүләрен билгеләп үтте.

Утырышта катнашкан Торак сәясәте һәм инфраструктура үсеше комитеты рәисе Александр Тыгин парламентарийларга законнарда системалы бушлыклар бар, хокук куллану предметына мөрәҗәгатьләрне анализларга кирәк, дип саный. Әгәр мондый фактлар ачыкланса, ТР Дәүләт Советы федераль дәрәҗәдә үзгәрешләр кертү инициативасы белән чыгарга мөмкин. Александр Тыгин фракциянең муниципалитетларны торак-коммуналь хуҗалык мәсьәләләре белән идарә итү процессына активрак җәлеп итәргә кирәклеге турындагы фикере белән килеште.

ТР Дәүләт торак инспекциясе башлыгы - ТР баш Дәүләт торак инспекторы Сергей Крайнов торак-коммуналь хезмәтләр өчен түләү буенча гражданнарның мөрәҗәгатьләре саны артуын раслады - соңгы дүрт айда аларның саны бер мең тирәсе тәшкил иткән. Аларның 40 проценты - җылыту өчен түләүне дөрес санамауга гражданнар шикаятьләре. Һәр очракта конкрет тикшерергә кирәк, дип басым ясады Сергей Крайнов. Гражданнар мөрәҗәгатьләре буенча тикшерүләр уздырганда хокук бозулар ачыклана, әмма бу массакүләм характерда түгел, дип ассызыклады ул.

Утырышта катнашучылар күтәргән һәр мәсьәлә буенча Татарстан Республикасының баш Дәүләт торак инспекторы җентекле аңлатмалар бирде.

КПРФ фракциясе әгъзасы, ТР Дәүләт Советы депутаты Фадбир Сафин билгеләп үткәнчә, мәсьәлә тарифларда гына түгел, халыкның түләү мөмкинлеге булу-булмауга да бәйле. Парламентарий фикеренчә, ресурслар белән тәэмин итүче оешмаларга инновацион, шул исәптән энергия саклау технологияләрен куллану аша тарифларны киметүгә омтылырга кирәк.

Утырышны тәмамлап, Хафиз Миргалимов мәсьәләләрне конструктив хәл итүгә чакырды. Түгәрәк өстәл барышында яңгыраган тәкъдимнәр ТР Хөкүмәтенә һәм муниципаль хакимият органнарына җибәреләчәк.