Депутатлар Роберт Миңнуллин каберенә чәчәкләр салдылар

2022 елның 1 августы, дүшәмбе, 13:20

Бүген Дәүләт Советы депутатлары һәм парламент Аппараты хезмәткәрләре төркеме Казанның Мирный бистәсе зиратында булды һәм Роберт Миңнуллин каберенә чәчәкләр салды.

Чәчәк салу тантанасында Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Таһир Һадиев Роберт Миңнуллин турындагы истәлекләре белән уртаклашты. "Бүген, Роберт Мөгаллимовичның туган көнендә, без аның парламентта чыннан да халык вәкиле булуын тагын бер кат искә алабыз, - диде депутат. - Талантлы шагыйрь һәм танылган җәмәгать эшлеклесе буларак, ул социаль әһәмиятле законнар эшләүдә һәм гражданнар өчен актуаль булган мәсьәләләрне хәл итүдә актив катнашты, сайлаучылар белән күп очраша иде. Без Роберт Миңнуллинны хәтерлибез һәм хөрмәт итәбез".  

Роберт Миңнуллин 1948 елның 1 августында Башкортстанда туган. Казан университетын тәмамлаганнан соң Татарстан газеталары, журналлары һәм телекомпанияләре редакцияләрендә эшләде. Татарстанның атказанган сәнгать эшлеклесе, Башкортстанның атказанган мәдәният хезмәткәре, Татарстанның халык шагыйре, Башкортстан Республикасы Халыклар дуслыгы ордены иясе.

Габдулла Тукай исемендәге Татарстан Республикасы Дәүләт премиясе лауреаты, Муса Җәлил исемендәге һәм Абдулла Алиш исемендәге республика премияләре, Фатыйх Кәрим исемендәге Башкортстан Республикасы дәүләт премиясе һәм Андерсен исемендәге халыкара әдәби премия лауреаты.

Роберт Миңнуллин беренче, икенче, өченче һәм дүртенче чакырылыш Татарстан Республикасы Дәүләт Советы депутаты булды. Төрле елларда Татарстан Республикасы Дәүләт Советы Рәисе урынбасары, Мәдәният һәм мәгариф комитеты рәисе, Дәүләт Советының Татарстан Республикасы законнары текстларының татар һәм рус телләрендә тиңдәшлеген билгеләү буенча комиссиясе рәисе булды.

Шагыйрь 2020 елның 27 мартында үлде.

Все материалы сайта доступны по лицензии:
Creative Commons Attribution 4.0 International