Дәүләт Советы депутатларының округларда эше дәвам итә. Узган атнада парламентарийлар гражданнарны кабул иттеләр, республика мәктәпләрен тәмамлаучыларга аттестатлар тапшырдылар, татарстанлыларны милли бәйрәмнәр белән котладылар.

8 июльдә Әлки районы Сиктермә авылында республика чуаш мәдәнияте бәйрәме – «Уяв»узды. Төп мәйданга Татарстанның төрле районнарыннан һәм илнең төрле төбәкләреннән 15 меңләп кунак килде. Татарстан җитәкчелеге исеменнән бәйрәм кунакларын Дәүләт Советы Рәисе урынбасары Марат Әхмәтов котлады. Чарада шулай ук Бюджет, салымнар һәм финанслар комитеты рәисе урынбасары Камил Нугаев катнашты.  Уяв – чуаш мәдәнияте, халык традицияләре һәм гореф-гадәтләре бәйрәме, ул чәчү эшләре тәмамланганнан соң үткәрелә.

7 июльдә Икътисад, инвестицияләр һәм эшкуарлык комитеты рәисе урынбасары Ринат Гайзатуллин эш сәфәре белән Буа муниципаль районында булды, анда «Бердәм Россия» партиясенең җирле бүлекчәсенең җәмәгать кабул итү бүлмәсендә гражданнарны кабул итте, шулай ук Яңа Тинчәле авылында «Рәуф» мәчетенең 15 еллыгы уңаеннан тантаналы чарада катнашты.

Гражданнарны кабул итү кысаларында буалылар җәмәгать транспорты эше, пляж төзелеше, шулай ук ипотека кредитын түләү өчен ана капиталын куллану турында сораулар күтәрделәр. Депутат барлык сорауларны контрольгә алды.

Көннең икенче яртысында Ринат Гайзатуллин Яңа Тинчәле авылында булды. Мәчет ачылуның юбилей датасы уңаеннан төп чара мәдәният йортында Коръән аятьләрен укып узды. Сәламләү сүзе белән ТР мөфтие Камил хәзрәт Сәмигуллин чыгыш ясады.

7 июльдә «Бердәм Россия» партиясенең төбәк иҗтимагый кабул итү бүлмәсендә социаль ярдәм мәсьәләләре буенча кайнар телефон линиясе узды. Татарстанлыларның мөрәҗәгатьләрен Торак сәясәте һәм инфраструктура үсеше комитеты рәисе урынбасары Камил Садриев, профильле министрлыклар һәм ведомстволар вәкилләре карады. Республика халкы пенсияләрне билгеләү һәм яңадан исәпләү, реабилитация чаралары, инвалидлык алу тәртибе мәсьәләләре белән кызыксынды.

5 июльдә Дәүләт Советы депутаты Руслан Нигъмәтулин Казан федераль университетының Яр Чаллы институтының икътисад бүлеген тәмамлаучыларга дипломнар тапшырды. Быел югары уку йортын һәм аның карамагындагы колледжны 2000гә якын студент тәмамлаган. Аларның 300 гә якыны кызыл дипломнар белән. "Барлык югары уку йортларын тәмамлаучыларга үзләрен һөнәрләрендә табуларын телим! Минем сезгә теләгем шул –үз белемнәрегезне һәм талантларыгызны республикабыз файдасына кулланыгыз!", - диде депутат. 

3-4 июльдә Казанда «Ребус: тарихи үзәктә төзелеш икътисады» халыкара форумы узды. Форумның төп бурычы – Россиядә һәм чит илләрдә төзелеш өлкәсендә иң яхшы практикаларны һәм кейсларны җыю, анализлау һәм төбәкләр һәм федераль үзәк эшенә иң яхшы практикаларны кертү буенча методик киңәшләр тәкъдим итү. Форум эшендә Торак сәясәте һәм инфраструктура үсеше комитеты рәисе Александр Тыгин катнашты.

4 июльдә Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова «Бердәм Россия»партиясенең Нурлат җирле бүлегенең җәмәгать кабул итү бүлмәсендә гражданнарны онлайн кабул итте. Нурлатның Промышленная урамында яшәүче кешеләр депутатка чүп мәйданчыгы булмау һәм контейнерлар җитмәү, шулай ук ишегалдында юлның сыйфаты турында зарланды.  Людмила Рыбакова әлеге мөрәҗәгатьне контрольгә алды.