Бүген Экология, табигатьтән файдалану, агросәнәгать һәм азык-төлек сәясәте комитеты утырышында  «2013-2022 елларга кадәр Татарстан Республикасында авыл хуҗалыгын үстерү һәм авыл хуҗалыгы продукциясе, чимал һәм азык-төлек базарын җайга салу» дәүләт программасының 2019 елда һәм 2020 елның I кварталында үтәлеше  мәсьәләсе каралды. Шулай ук  депутатлар  аерым закон актларына үзгәрешләр кертү буенча фикер алыштылар һәм комитетның 2020 елга эш планын расладылар.

Комитет утырышы Россия Дәүләт Думасы депутаты булган мәрхүм Айрат Хәйруллинны искә алу белән башланды.

«VI чакырылыш Дәүләт Советы депутаты, комитет әгъзасы Габделхәй Кәримов һәм Россия Дәүләт Думасы депутаты Айрат Хәйруллинның вакытсыз үлеме белән бәйле рәвештә кайгы уртаклашабыз», — диде комитет рәисе Азат Хамаев.

Ул Айрат Хәйруллинның 1999 елдан 2003 елга кадәр Экология, табигатьтән файдалану, агросәнәгать һәм азык-төлек сәясәте комитеты әгъзасы булганын искәртте. «Без бергә эшләдек. Энергияле, максатына омтылучан иде», — дип искә алды Азат Хамаев.

«Габделхәй Кәримов һәм Айрат Хәйруллин республика һәм ил өчен күп эш башкардылар. Авыр туфраклары җиңел булсын! Бер минут тынлык белән искә алуны сорыйм», — дип мөрәҗәгать итте комитет рәисе.

Утырышта «2013-2022 елларга кадәр Татарстан Республикасында авыл хуҗалыгын үстерү һәм авыл хуҗалыгы продукциясе, чимал һәм азык-төлек базарын җайга салу» дәүләт программасының 2019 елда һәм 2020 елның I кварталында үтәлеше  мәсьәләсе каралды.

Татарстан авыл хуҗалыгы тулай төбәк продукт күләме буенча Россиядә дүртенче урында тора, дип белдерде Татарстанның Авыл хуҗалыгы һәм азык-төлек министры урынбасары Ришат Хәбипов.

«Татарстан авыл хуҗалыгы тулай төбәк продукт күләме буенча дүртенче позицияне саклап кала алды. Безнең алда Краснодар, Белгород һәм Ставрополье», — диде ул.

Ришат Хәбипов сүзләренә карагандав, терлекчелек тармагының барлык категорияләрендә авыл хуҗалыгы продукциясендә үсеш күзәтелә.

«Былтыр 1 млн 893 мең тонна сөт җитештерелгән, Россиядә беренче урында торабыз. Терлекчелек, кошчылык буенча 40 тан артык проект гамәлдә. Бу безгә Россиядә лидерлык урынын саклап калырга мөмкинлек бирәчәк», — диде ул.

Грант ярдәме нәтиҗәсендә, Татарстанда 2020 елда терлек саны тагы да артыр дип фаразлана. Ришат Хәбипов республикада 450 мең шәхси хуҗалык исәпләнүен искәртте. 2020 елда да кече хуҗалык формаларына ярдәм дәвам итәчәген билгеләп узды.

«Грантлар нәтиҗәсендә, савым сыерлары 3 мең башка, мөгезле эре терлек 3300 башка, кош саны 1 млн. га артыр дип фаразлана. Бу авыл торак пунктларында тагын өстәмә 400 эш урыны булдыру мөмкинлеге бирәчәк», — диде ул.

Ришат Хәбипов фермерларга һәм авыл хуҗалыгы кооперацияләренә ярдәм итү буенча илкүләм проектны гамәлгә ашыруга Татарстан актив кушылганын әйтте.

«418,8 млн. сум акча үзләштерелде. Шуның бер өлеше „Агростартап“ программасына бүленде. 103 кеше 312 млн сумлык грант алды. Алар үз программаларын гамәлгә ашыра. 18 ай эчендә объектны файдалануга тапшырып, терлек белән тутырырга тиеш», — диде.

2019 елда икмәк, шикәр чөгендере, бәрәңге, яшелчә уңышы, 2018 елга караганда, күбрәк булган.  «2019 ел нәтиҗәле булды. Бөтен бурычларны хәл итүгә ирештек. 250,9 млрд сумлык авыл хуҗалыгы тулай төбәк продукты җитештердек, үсеш индексы 103 процент», — диде министр урынбасары.

Аның сүзләренә караганда, язга шактый уҗым мәйданнары һәлак булуга карамастан, яңадан чәчеп, ахыр чиктә 4 млн 521 мең тонна уңыш алуга ирешелгән. «Уңыш күрсәткече гектарына 28,6 центнер. Буалдагы елга караганда, 1,8 центнерга күбрәк», — диде.

Ришат Хәбипов шикәр чөгендере уңышы 2 млн 804 мең тонна булганын һәм моның өч шикәр заводы эшен тәэмин итәргә мөмкинлек биргәнен әйтте.

Бәрәңге уңышы - 1 млн. 214 мең тонна булган. Узган ел белән чагыштырганда, 2,1 процентка артык. Яшелчәләр - 343,9 мең тонна. Бу 2018 елга караганда, 5 процентка артык.

Мәгълүмат кабул ителде.