Бүгенге утырышта депутатлар Дәүләт теркәве, кадастр һәм картография федераль хезмәтенең Татарстан Республикасы буенча идарәсе эшчәнлеге турында мәгълүмат белән таныштылар. Докладны  Татарстан Республикасы буенча идарә җитәкчесе урынбасары Артем Костин тәкъдим итте. Ул билгеләп үткәнчә, 10 ел эчендә Дәүләт теркәве, кадастр һәм картография федераль хезмәтенең Татарстан Республикасы буенча идарәсе тарафыннан 10 миллионга якын исәпкә алу-теркәү гамәлләре башкарылган. Шул ук вакытта дәүләт хезмәтләре күрсәтү вакыты, эшенә һәм мөрәҗәгать итү ысулына карап, 30 көннән 12, 9, 5 һәм бер эш көненә кадәр кыскарган.

Докладчы әйтүенчә, хәзерге вакытта Татарстан Республикасы Дәүләт теркәве, кадастр һәм картография федераль хезмәте идарәсенең өстенлекле юнәлешләре арасында электрон рәвештә дәүләт хезмәтләре күләмен арттыру эше кала.  Хәзерге вакытка ведомство барлык дәүләт хезмәтләрен электрон рәвештә Росреестр порталы аша күрсәтүгә күчкән.

-  Идарә буенча, ел башы белән чагыштырганда, электрон гаризалар саны арту күзәтелде. 2020 елның беренче яртыеллыгында электрон рәвештә 81 меңнән артык гариза бирелгән, - дип ачыклык кертте Артём Костин.

Идарә җитәкчесе урынбасары хәбәр иткәнчә, 2020 елның беренче яртыеллыгында исәпкә алу-теркәү гамәлләре саны 380 меңнән артык тәшкил иткән, шуларның 55 меңнән артыгы - ипотека турында теркәү язмалары, өлешләп төзелештә катнашу килешүләре  саны - 7 меңнән артык, шул исәптән эскроу счетын кулланып - 3 мең тирәсе.

Идарә бүген кирәкле компьютер җиһазлары белән тулысынча тәэмин ителгән. Документларны кабул итү һәм бирү КФҮ системасы аша тулы күләмдә гамәлгә ашырыла. 1 миллионнан артык реестр эше цифрлаштырылган, бу чаралар теркәү гамәлләрендә коррупцион өлешне минимальләштерергә мөмкинлек биргән.

Дәүләт җир күзәтчелеге идарәсенең иң мөһим функцияләрен гамәлгә ашырганда җитди алгарышка ирешелгән. Соңгы ике ел дәвамында Идарә Росреестрның дәүләт җир күзәтчелеге буенча территориаль органнары рейтингында алдынгы урыннарны били.  Мондый нәтиҗәгә ирешүгә, шул исәптән, ведомство эшендә югары төгәллекле иярчен геодезик җиһазлар куллануга ярдәм итә.

Артем Костин идарә актив рәвештә дистанцион технологияләрне эшкә кертү, мәсәлән, республикада пилотсыз очу аппаратларын куллану проектын гамәлгә ашыруда катнашулары хакында сөйләде. Нәтиҗәләр күрсәткәнчә, җир күзәтчелеге өлкәсендә "пилотсыз очкычлар" куллану максатка ярашлы, алар җир кишәрлекләренә керү чикләнгән яки бөтенләй булмаган очракта да тикшерүләр уздырырга мөмкинлек бирә.

Җир законнарын бозуларга каршы көрәшкә зур игътибар бирелә. Шунысын да билгеләп үтәргә кирәк, Идарә кайбер очракларда кисәтү белән генә чикләнеп, штраф санкцияләрен кулланмый һәм, шул рәвешле, хокук бозуларны тикшерү башында бетерү мөмкинлеген бирә. Шул ук вакытта бизнеска басымны киметү чаралары сыйфатында кече һәм урта эшкуарлык субъектларына карата уздырыла торган тикшерүләр санын киметү мөһим булып кала.

Татарстан Росреестры җитәкчесе урынбасары кадастр инженерлары эшчәнлегенә аерым тукталды, алар белән хезмәттәшлеккә аерым игътибар бирелә, чөнки аларның эш нәтиҗәләре дәүләт хезмәтләре идарәсе тарафыннан күрсәтелә торган сыйфатка йогынты ясый.    Идарә эшчәнлегендәге яңалыкларның берсе - хезмәт хакы буенча бурычлары булган банкрот предприятиеләрдә республика прокуратурасы белән ведомствоара хезмәттәшлек итү. 2020 елның беренче яртыеллыгында Идарә адресына арбитраж идарәчеләрнең гамәлләренә карата 287 шикаять килгән, тикшерү нәтиҗәләре буенча 64 беркетмә төзелгән, 9 арбитраж идарәчененең квалификациясе алынган. Гариза бирүчеләрнең хокукларын ялган электрон имзалар белән караклык очракларыннан яклау буенча эш алып барыла.

Идарәнең икенче өстенлекле юнәлеше булып кече һәм урта бизнеска ярдәм итү буенча илкүләм проектны гамәлгә ашыру эше тора.

Эшкуарлык бергәлегенә уңай шартлар тудыру һәм «юл картасын» гамәлгә ашыру өчен, Идарә берничә чара үткәрә: исәпкә алу-теркәү гамәлләре вакыты бер эш көненә кадәр кыскара, КФҮ белән оператив хезмәттәшлек җайга салына, кече һәм урта эшкуарлык субъектлары өчен консультацияләрнең махсус тәрәзәсе һәм башкалар. Татарстан Росреестры шулай ук Татарстан Республикасы Эшкуарлыкка ярдәм фонды белән тыгыз хезмәттәшлек итә.

Хәзерге вакытта Росреестр күчемсез мөлкәт өлкәсендә яңа масштаблы проект башкаруга әзерләнә, проектны гамәлгә ашыру шактый дәрәҗәдә Россия Федерациясе субъектларының милек салымнары һәм җыемнары буенча берләштерелгән бюджетын формалаштыруга йогынты ясаячак, шулай ук күчемсез мөлкәт милекчеләре хокукларын яклауны тәэмин итәчәк.

- Идарәнең бердәм коллективыннан һәм Кадастр палатасы, Президент Аппараты һәм Министрлар Кабинеты, Дәүләт Советы Аппараты, КФҮ, нотариат, шулай ук республика һәм федераль хакимият органнары, җирле үзидарә органнары белән хезмәттәшлектән башка Татарстан Росреестрының узган дистә елдагы казанышлары тормышка аша алмас иде. Ел саен безнең уртак эшебез Татарстан Республикасы халкы өчен тагын да нәтиҗәлерәк һәм нәтиҗәле булыр дип өметләнәбез, - диде ул чыгышын тәмамлап.

- Без сезнең ведомство эшчәнлеге турындагы мәгълүматны беренче тапкыр тыңлыйбыз, – дип мөрәҗәгать итте ТР Дәүләт Советы Рәисе Фәрит Мөхәммәтшин Артем Костинга,  – вакыт-вакыт сезгә сораулар бирелүен исәпкә алып тыгыз хезмәттәшлектә булачакбыз. Шуңа күрә муниципалитетлар белән үзара хезмәттәшлек итүнең яңа программа комплексын гамәлгә кертү актуаль булып кала.

Депутатлар алынган мәгълүматны игътибарга алды.