Яңалыклар

Татарстан Республикасында "Бердәм Россия" партиясенең төбәк иҗтимагый кабул итү бүлмәсендә торак-коммуналь хуҗалык мәсьәләләре буенча гражданнарны кабул итү атналыгы уза.

Луганск Халык Республикасына Татарстаннан чираттагы гуманитар йөк китерелде. Махсус хәрби операция уздыру зонасына аны Дәүләт Советы депутатлары – Социаль сәясәт комитеты рәисе Алексей Созинов һәм Законлылык һәм хокук тәртибе комитеты рәисе урынбасары Ринат Фазылов озатып барды. Парламентарийлар Татарстан шефлыкка алган Лисичанск һәм Рубежное шәһәрләрендә булдылар, гуманитар ярдәм күрсәттеләр, Татарстан хәрбиләре, шулай ук Лисичанскида эшләүче республика табиблары белән очраштылар, социаль объектлар эше белән таныштылар.

Бүген Бәшир Рәмиев исемендәге ИТ-паркта Бильярд спорты буенча Татарстан Республикасы Рәисе Кубогына III халыкара ярышлар башланды. Ярышлар Дөнья Кубогының беренче этабы булып тора. Дөнья рейтингының иң көчле 80 спортчысы ир-атлар һәм хатын-кызлар арасында «Ирекле пирамида» («Свободная пирамида») дисциплинасында көч сынашачак. Катнашучыларны республика җитәкчелеге исеменнән Дәүләт Советының Мактаулы Рәисе Фәрит Мөхәммәтшин сәламләде.

Дәүләт Советының унтугызынчы утырышында кабул ителгән яңа республика законнары үз көченә керә. Махсус хәрби операциядә катнашкан яисә Россия чикләрен саклаган ятим балаларга ярдәм итү чаралары закон нигезендә киңәйтелә, рекреацион объектларны үстерү өчен су саклау зоналарында вакытлыча юллар төзү тәртибе билгеләнә, шулай ук вазыйфаи затларның мөлкәти характердагы керемнәре, мөлкәте һәм йөкләмәләре турында белешмәләр бирүнең яңа тәртибе кертелә. Тулырак – безнең  «Закон үз көченә керде» даими рубрикасында.

Бүген В.М.Лебедев исемендәге Россия дәүләт юстиция университетының Казан филиалы студентлары – «Дәүләт Думасы моделе» эшлекле уенында катнашучылар һәм лауреатлар Дәүләт Советында булдылар. Закон чыгару конкурсында 8 команда катнашкан, яшьләр федераль законнарга төзәтмәләр проектларын эшләгәннәр. Булачак юристлар белән Социаль сәясәт комитеты рәисе урынбасары Ольга Воронова һәм Законлылык һәм хокук тәртибе комитеты рәисе урынбасары Ринат Фазылов очрашты.

Бүген Кырым Республикасы Дәүләт Советында (Симферополь шәһәре) Россия Закон чыгаручылар советының Россия Федерациясенең яңа субъектларын РФ хокукый системасына интеграцияләү мәсьәләләре буенча комиссиясе утырышы булды. Парламентарийлар илнең бердәм хокукый кырында законнарны гармонияләштерү, берләшкән регионнарны Россиянең хокукый һәм икътисадый киңлекләренә интеграцияләү мәсьәләләре турында фикер алыштылар, шулай ук үзләренең парламентара хезмәттәшлек тәҗрибәләре белән уртаклаштылар. Татарстан Республикасының Россия Федерациясенең яңа субъектлары белән хезмәттәшлеге турында Татарстан Дәүләт Советы Рәисе урынбасары Юрий Камалтынов сөйләде.

Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, республика муниципалитетларындагы социаль объектларда булды һәм тармак министрлыклары һәм ведомстволары утырышларында катнашты.

Бүген парламентта Дәүләт Советы депутатлары һәм аларның ярдәмчеләре өчен видеоэлемтә режимында «2026 елда торак-коммуналь хуҗалык өлкәсендә тарифларны җайга салу» темасына семинар узды.  Катнашучылар профильле министрлыклар һәм ведомстволар вәкилләре белән берлектә тарифларны җайга салу, түләү кагыйдәләре, идарәче компанияләр эше өлкәсендәге яңалыклар, шулай ук гражданнарны шәхси кабул итү барышында депутатлар корпусы адресына һәм Дәүләт Советы Аппаратының гражданнар мөрәҗәгатьләре белән эшләү бүлегенә керә торган актуаль темалар һәм мәсьәләләр буенча фикер алыштылар. Семинарны Дәүләт Советы Секретаре Лилия Маврина һәм Торак сәясәте һәм инфраструктура үсеше комитеты рәисе Андрей Егоров үткәрде.

Бүген Дәүләт Советында КПРФ фракциясе матбугат конференциясе узды, анда коммунист депутатлар фракциянең республика парламентының язгы сессиясенә куйган бурычлары турында сөйләделәр. Журналистларның сорауларына КПРФ фракциясе җитәкчесе Хафиз Миргалимов һәм Дәүләт Советы депутаты, КПРФ фракциясе әгъзасы Фәдбир Сафин җавап бирде. Матбугат конференциясендә шулай ук Казан шәһәр Думасы депутаты Андрей Королев катнашты.

«Бердәм Россия» партиясенең Халык программасы бүген бик кирәкле һәм күп яктан партия активын, дәүләт һәм муниципаль хакимият органнарын «барлык фронтлар буенча» иҗади эшкә туплый, күпмилләтле илебезнең һәр шәһәрендә һәм авылында тормыш сыйфатына уңай үзгәрешләр кертә. Бу хакта «Бердәм Россия» Бөтенроссия сәяси партиясенең Татарстан төбәк бүлеге Секретаре, Дәүләт Советының Мактаулы Рәисе Фәрит Мөхәммәтшин бүген Түбән Новгородта узган «Нәтиҗә бар!» (Есть результат!») форумында  журналистлар белән аралашканда белдерде.