Яңалыклар

3 – 4 июнь көннәрендә Самара өлкәсендә Идел буе федераль округы субъектларының дәүләт хакимияте Закон чыгару органнары ассоциациясенең 72 нче утырышы уза, аның эшендә Дәүләт Советы Рәисе Фәрит Мөхәммәтшин катнаша. Гадәттәгечә, Идел буе закон чыгаручыларының чираттагы очрашулар сериясен яшь парламентарийлар ачты. Бүген Самарада узган Идел буе федераль округы төбәкләре закон чыгару җыеннары каршындагы Яшьләр парламентлары ассоциациясе утырышында авыл җирлегендә эшләүче яшь белгечләргә ярдәм чараларын камилләштерү, шулай ук инновацион эшчәнлекне үстерү һәм илнең технологик суверенитетын тәэмин итү мәсьәләләре тикшерелде.

Бүген, Халыкара балаларны яклау көнендә, Дәүләт Советында «Мәктәп укучылары өчен мәдәният» мәдәни-мәгариф проекты активистларын бүләкләү тантанасы узды. Җиңүчеләрнең дипломнарын мәктәп укучыларына Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова тапшырды.

Бүген Татарстан Халыклар дуслыгы йортында РФ Федераль Собраниесе Дәүләт Думасында «Бердәм Россия» фракциясе җитәкчесе, Россия халыклары ассамблеясе рәисе Владимир Васильевның Татарстан халыклары ассамблеясе милли-мәдәни берләшмәләре лидерлары белән очрашуында милли һәм миграция сәясәтен гамәлгә ашыру, мәдәниятне һәм традицияләрне, республикада яшәүче халыкларның туган телләрен саклау һәм үстерү мәсьәләләре турында фикер алыштылар. Очрашуда Дәүләт Советы Рәисе, Татарстан халыклары ассамблеясе рәисе Фәрит Мөхәммәтшин һәм Татарстан Республикасы Рәисе Администрациясе җитәкчесе Әсгать Сәфәров катнашты.

Дәүләт Советы Рәисе, Татарстан халыклары Ассамблеясе Рәисе Фәрит Мөхәммәтшин РФ ФС Дәүләт Думасында «Бердәм Россия» фракциясе җитәкчесе, Россия халыклары ассамблеясе рәисе Владимир Васильев белән очрашты. Бүген республика парламентында узган очрашуда милли һәм миграция сәясәтен гамәлгә ашыру, республикада яшәүче халыкларның мәдәниятен, гореф-гадәтләрен һәм йолаларын саклау һәм үстерү буенча Татарстан халыклары Ассамблеясе эшчәнлеге хакында сөйләштеләр.

Бүген ТР Дәүләт Советы Рәисе Фәрит Мөхәммәтшин Мамадыш муниципаль районы Советының чираттан тыш утырышында катнашты. Муниципаль депутатлар РФ Федераль Собраниесе Дәүләт Думасына эшкә күчү сәбәпле, район башлыгы Анатолий Ивановның отставкасын кабул иттеләр, шулай ук Мамадыш районы Башкарма комитеты җитәкчесе вазыйфаларын башкаруга Вадим Никитин кандидатурасын хупладылар.

Бүген ТР Дәүләт Советы Секретаре Лилия Маврина Магадан өлкә Думасы Аппараты җитәкчесе Руслан Кастоев белән очрашты. Руслан Кастоев  Казанга эш сәфәре белән килгән.

Бүген Дәүләт Советы Рәисе Фәрит Мөхәммәтшин, парламент депутатлары Казанның Яңа Татар зиратында булып төрле елларда төрле дәүләт вазыйфаларында эшләгән күренекле сәяси эшлеклеләрне, шул исәптән ТАССР Верховный Советы җитәкчеләрен хөрмәтләп искә алдылар. Зиярат кылу ТАССРны оештыру  турында декретка кул куелуга 104 ел тулуга багышланган чаралар кысаларында узды, бу датаны республика җәмәгатьчелеге 27 майда билгеләп үтте.

Бүген Казанда көн дәвамында мәктәпкәчә белем бирү оешмаларына, мәктәпләргә, урта махсус һәм югары уку йортларына кабул итү мәсьәләләре буенча «Хатын-кыз игътибары» кайнар телефон линиясе эшләде. Татарстанлыларның сорауларына «Мәрхәмәт- Милосердие» берләшмәсе депутатлары, ТРда Кеше хокуклары буенча вәкаләтле вәкил, прокуратура, ТР Мәгариф һәм фән министрлыгы, ТР Яшьләр эшләре министрлыгы вәкилләре җавап бирде.

Алтынчы чакырылыш Дәүләт Советының илле дүртенче утырышы 6 июньдә узачак. Мондый карар бүген парламент Президиумы утырышында кабул ителде. Депутатлар 29 мәсьәлә, шул исәптән 16 республика законы проектын һәм 5 Федераль закон проектын караячак.

Бүген партиянең төбәк бүлеге сәяси советы Президиумы утырышында «Бердәм Россия»нең алдан тавыш бирүенә нәтиҗә ясалды. Җиденче чакырылыш Дәүләт Советына сайлау кампаниясендә партиядән тәкъдим ителгән алдан тавыш бирү җиңүчеләре исемлегенә бер мандатлы һәрбер сайлау округыннан бер вәкил керде. Моннан тыш, 57 кеше «Бердәм Россия» партия исемлегендә тәкъдим ителә. Сәяси совет президиумы утырышын Дәүләт Советы Рәисе, «Бердәм Россия» партиясенең Татарстан төбәк бүлеге Секретаре Фәрит Мөхәммәтшин үткәрде.