Яңалыклар

Җиденче чакырылыш Дәүләт Советының унынчы утырышы 11 июньдә узачак. Бүген парламент Президиумы утырышында шундый карар кабул ителде. Депутатлар 30 мәсьәләне, шул исәптән 15 республика законы проектын, 7 федераль закон проектын һәм төбәкләрнең закон чыгару инициативаларын, шулай ук башка мәсьәләләрне карарга планлаштыра.

Бүген Экология, табигатьтән файдалану, агросәнәгать һәм азык-төлек сәясәте комитетының күчмә утырышында республикада атмосфера һавасының сыйфаты турында сүз барды. Парламентарийлар «Сибур» предприятиесенең «Казаноргсинтез» күчмә экология лабораториясе эше белән таныштылар, шулай ук Экология министрлыгының атмосфера һавасының чисталыгын контрольдә тотуның автоматик станциясен карадылар. Утырыш эшендә Дәүләт Советы Рәисе урынбасары Марат Әхмәтов катнашты.

Бүген Казан шәһәренең Халыкара сервис көллиятендә Мәгариф, мәдәният, фән һәм милли мәсьәләләр комитетының һәм комитет каршындагы Эксперт советының уртак күчмә утырышы булды, анда парламентарийлар 2024 елда мәгарифне үстерү программаларын һәм «Профессионалитет» федераль проектны гамәлгә ашыру мәсьәләләре буенча фикер алыштылар. Утырыш эшендә ТР Рәисе ярдәмчесе, ТР Рәисенең Дәүләт Советындагы тулы вәкаләтле вәкиле Тимур Нагуманов катнашты. Утырышны Мәгариф, мәдәният, фән һәм милли мәсьәләләр комитеты рәисе Айрат Зарипов үткәрде.

Дәүләт Советы депутатлары һәм парламент Аппараты хезмәткәрләре «Хәтер эстафетасы» хәйрия акциясенә кушылдылар, үзләренең бер көнлек хезмәт хакларын сугыш ветераннары каберлекләрен торгызуга күчерделәр.

Дәүләт Советы депутатларының округларда эшчәнлеге дәвам итә. Бу атнада парламентарийлар гражданнарны кабул итте, гомуми белем бирү учреждениеләрендә булды, республиканың чыгарылыш укучыларын соңгы кыңгырау бәйрәме белән котладылар, фәнни конференцияләрдә һәм социаль әһәмиятле чараларда катнаштылар.

Бүген Яшел Үзән районында, Зөя төбәкара мультимодаль логистик үзәге базасында, Торак сәясәте һәм инфраструктура үсеше комитетының һәм комитет каршындагы Эксперт советының күчмә уртак утырышы булды, анда парламентарийлар елга транспортында логистика мәсьәләләре, аерым алганда, илнең эчке су юлларында йөк төяү комплексларын үстерү мәсьәләләре буенча фикер алыштылар. Утырышны Торак сәясәте һәм инфраструктура үсеше комитеты рәисе Андрей Егоров үткәрде.

Бүген узган Социаль сәясәт комитеты һәм комитет каршындагы Эксперт советының уртак утырышында депутатлар республикада балаларның һәм яшьләрнең җәйге ялын оештыруга югары бәя бирделәр. Утырыш эшендә катнашкан Дәүләт Советы Рәисе урынбасары Юрий Камалтынов ирешелгән нәтиҗәләргә тукталып калмаска һәм студентлар өчен җәйге ял оештыру белән шөгыльләнергә чакырды.

Бүген Дәүләт Советында Бюджет, салымнар һәм финанс комитеты утырышы булды, анда депутатлар 2024 елга Татарстан Республикасы бюджеты һәм Татарстан Республикасы ММИ Территориаль фонды бюджеты үтәлеше турындагы закон проектларын, 2025 елның беренче кварталы өчен республика бюджеты һәм ММИ Территориаль фонды бюджеты үтәлеше, шулай ук салым түләүчеләрнең аерым категорияләренә салым преференцияләрен бирүгә юнәлдерелгән закон проектларын карадылар. Комитет утырышы эшендә Дәүләт Советы Рәисе урынбасары Марат Әхмәтов катнашты.

«Бердәм Россия» партиясенең Татарстандагы төбәк бүлеге сәяси советы Татарстан Рәисен сайлау алдыннан узачак алдан тавыш бирүдә катнашачак ике кандидатны билгеләде. Алар – Татарстанның гамәлдәге Рәисе, партиянең Югары Советы бюросы әгъзасы Рөстәм Миңнеханов һәм Россия сенаторы Александр Терентьев. Бу хакта бүген «Бердәм Россия» партиясенең төбәк бүлеге политсоветы президиумы утырышында мәгълүм булды. Утырышны Дәүләт Советы Рәисе, «Бердәм Россия»нең Татарстандагы төбәк бүлеге секретаре Фәрит Мөхәммәтшин үткәрде.

 

ТР Дәүләт Советы Рәисе Фәрит Мөхәммәтшин «Профессионаллар» чемпионатының төбәк этабы җиңүчеләре һәм призерлары – А.Н.Туполев исемендәге Казан милли тикшеренү техник университеты студентлары белән очрашты. Очрашу «Персона» проекты кысаларында «Бердәм Россия»нең иҗтимагый ярдәм штабында узды. Вакыйга яшьләрнең җәмәгатьчелек фикере лидерлары белән ачык диалогын формалаштыруга юнәлтелде.