Яңалыклар

Бүген Дәүләт Советының Бюджет, салымнар һәм финанслар, Мкътисад, инвестицияләр һәм эшкуарлык, Торак сәясәте һәм инфраструктура үсеше, Законлылык һәм хокук тәртибе, Социаль сәясәт комитетларының уртак утырышында Татарстан Премьер-министры һәм аның урынбасарлары кандидатураларын килештерү мәсьәләләре каралды. Уртак утырышны Дәүләт Советы Рәисе урынбасары Юрий Камалтынов үткәрде.

Бүген Казанда Салих Сәйдәшев исемендәге Зур концерт залында Рөстәм Миңнехановның Татарстан Республикасы Рәисе вазыйфасына керешү тантанасы булды.

Бүген Дәүләт Советы Рәисе Фәрит Мөхәммәтшин Бөтенкытай халык вәкилләре җыелышының Даими комитеты Рәисе урынбасары Пэн Цинхуа белән очрашты. Очрашу  Галиәсгар Камал исемендәге Татар дәүләт академия театрының яңа бинасында узды. Парламентарийлар Россия белән Кытай арасындагы күпкырлы хезмәттәшлек, шул исәптән парламентара элемтәләр кысаларында төбәкара диалогны киңәйтү мәсьәләләре буенча фикер алыштылар.

Казанга Бөтенкытай халык вәкилләре җыелышының Даими комитеты Рәисе урынбасары Пэн Цинхуа килде. Г.Тукай исемендәге «Казан» халыкара аэропортында Пэн Цинхуа әфәндене Татарстан Республикасы Дәүләт Советы Рәисе Фәрит Мөхәммәтшин каршы алды.

Бүген Дәүләт Советының кече залында Казан федераль университетының Дәүләт һәм муниципаль идарә югары мәктәбендә «яшь хезмәткәр мәктәбе» программасы буенча квалификация күтәрүче дәүләт һәм муниципаль хезмәткәрләр өчен семинар узды. Республика министрлыклары һәм ведомстволары, муниципалитетлары аппаратлары хезмәткәрләре белән Дәүләт Советы Секретаре Лилия Маврина очрашты.

Татарстан Республикасы Рәисе вазыйфасына керешү тантанасы 19 сентябрьдә сәгать унда Салих Сәйдәшев исемендәге Дәүләт Зур концерт залында узачак. Бүген парламент Президиумы утырышында шундый карар кабул ителде. Шул ук көнне Дәүләт Советының уникенче утырышы узачак, анда Татарстан Премьер-министры һәм аның урынбасарлары кандидатураларын килештерү планлаштырыла. Киләсе атнада, 25 сентябрьдә, Президиум карары нигезендә, шулай ук Дәүләт Советының  берьюлы ике утырышы узачак – сәгать унда унөченче утырыш кысаларында Татарстан Рәисе Дәүләт Советына еллык Юлламасын җиткерәчәк (утырыш Салих Сәйдәшев исемендәге Дәүләт Зур концерт залында узачак), сәгать уникедә парламентның утырышлар залында ундүртенче утырыш ачыла.

Бүген Мәскәүдә VIII чакырылыш РФ ФС Дәүләт Думасының көзге сессиясе ачылды. Видеоэлемтә режимында көзге сессиянең беренче утырышында Дәүләт Советы Рәисе Фәрит Мөхәммәтшин катнашты.

Дәүләт Советы Рәисе, «Бердәм Россия» Бөтенроссия сәяси партиясенең Татарстан төбәк бүлеге Секретаре Фәрит Мөхәммәтшин сайлаулар узган төбәкләрдәге партия бүлекчәләре белән киңәшмәдә катнашты. Видеоконференцэлемтә форматында узган  киңәшмәне «Бердәм Россия» партиясе Рәисе Дмитрий Медведев үткәрде.

Дәүләт корылышы һәм җирле үзидарә комитеты рәисе урынбасары, КПРФ фракциясе җитәкчесе Хафиз Миргалимов Бердәм тавыш бирү көнендә катнашты, Татарстан Рәисен һәм җирле үзидарәнең вәкиллекле органнары депутатларын сайлауда тавыш бирде. Ул Казанның 155 нче гимназиясендә урнашкан 243 нче сайлау участогында тавыш бирде.

Татарстан Республикасы Дәүләт Советы каршындагы Яшьләр парламенты рәисе Дамир Нургалиев Татарстан Рәисен һәм республика җирле үзидарәсенең вәкиллекле органнарына депутатлар сайлауда катнашты. Сайлау участогына ул гаиләсе белән килгән.